Монгол, Германы боловсролын салбарын хамтын ажиллагааны баримт бичгүүдийг байгуулав

Монгол Улсын Ерөнхийлөгч Ухнаагийн Хүрэлсүхийн ХБНГУ-д хийж буй төрийн айлчлалын хүрээнд талууд 2026 оны 10 дугаар сарын 22-ны өдөр хоёр улсын боловсролын салбарын хамтын ажиллагааг бэхжүүлэх зорилгоор их, дээд сургуулиуд хоорондын долоон баримт бичиг байгууллаа.

Боловсролын салбарт эдгээр санамж бичгийг байгуулснаар хамтын ажиллагааны 100 жилийн түүхтэй түншлэлийг бататгах, эрдэм шинжилгээ, судалгааны чадавхыг бэхжүүлэх, багш, судлаач, оюутнуудын урт болон богино хугацааны сургалт, судалгаа, төсөл, эрдэм шинжилгээний солилцоог нэмэгдүүлэх боломж бүрдэв.

Түүнчлэн, уул уурхайн бүс нутгийн ус, байгаль орчны менежмент, уурхайн хаалтын дараах ландшафтын нөхөн сэргээлт, цахилгааны инженерчлэл зэрэг чиглэлээр бакалаврын түвшинд 2+2, ахисан түвшинд 1+1 хамтарсан хөтөлбөр хэрэгжүүлэх шинэ хуудас нээгдэж байна.

Холбооны Бүгд Найрамдах Герман Улсын их сургуулиуд Монгол Улсын дээд боловсролын салбарыг хүлээн зөвшөөрч, хамтарсан хөтөлбөр хэрэгжүүлж буй нь хоёр улсын боловсролын хамтын ажиллагааг шат ахиулсан чухал алхам боллоо.

“Монгол Улсын их сургууль болон Холбооны Бүгд Найрамдах Герман Улсын Лайпцигийн их сургууль хоорондын харилцан ойлголцлын санамж бичиг”-т Монгол Улсын их сургуулийн ректор, профессор Баянжаргалын Очирхуяг, Лайпцигийн их сургуулийн ректор, доктор, профессор Ева Инес Обергфелл нар гарын үсэг зурав.

“Монгол Улсын их сургууль болон Холбооны Бүгд Найрамдах Герман Улсын Дрездений Техник, эдийн засгийн дээд сургууль хоорондын хамтын ажиллагааны гэрээ”-нд Монгол Улсын их сургуулийн ректор, профессор Баянжаргалын Очирхуяг, Дрездений Техник, эдийн засгийн дээд сургуулийн ректор, доктор, профессор Инго Гестринг нар гарын үсэг зурав.

“Монгол Улсын Шинжлэх ухаан, технологийн их сургууль, Эрдэнэс ҮТП ХХК болон Холбооны Бүгд Найрамдах Герман Улсын Фрайбергийн Уул уурхайн академийн Технологийн их сургууль хоорондын харилцан ойлголцлын санамж бичиг”-т Шинжлэх ухаан, технологийн их сургуулийн ректор, доктор, профессор Төмөрпүрэвийн Намнан, Эрдэнэс ҮТП ХХК-ийн гүйцэтгэх захирал Наранцацралтын Мөнх-Идэр, Фрайбергийн Уул уурхайн академийн Технологийн их сургуулийн ректор, доктор, профессор Ютта Эмес нар гарын үсэг зурав.

“Монгол Улсын Шинжлэх ухаан, технологийн их сургууль болон Холбооны Бүгд Найрамдах Герман Улсын Дрездений Техникийн их сургууль хоорондын харилцан ойлголцлын санамж бичиг”-т Шинжлэх ухаан, технологийн их сургуулийн ректор, доктор, профессор Төмөрпүрэвийн Намнан, Дрездений Техникийн их сургуулийн Амьдралын бүх үе шатны сургалтын асуудал эрхэлсэн проректор, профессор Нильс Модлер нар гарын үсэг зурав.

“Монгол Улсын Шинжлэх ухаан, технологийн их сургууль болон Холбооны Бүгд Найрамдах Герман Улсын Хемницийн технологийн их сургууль хоорондын харилцан ойлголцлын санамж бичиг”-т Шинжлэх ухаан, технологийн их сургуулийн ректор, доктор, профессор Төмөрпүрэвийн Намнан, Хемницийн технологийн их сургуулийн ректор, доктор, профессор Герт Штромайэр нар гарын үсэг зурав.

“Монгол-Германы хамтарсан Ашигт малтмал, технологийн их сургууль болон Холбооны Бүгд Найрамдах Герман Улсын Дрездений Техник, эдийн засгийн дээд сургууль хоорондын хамтын ажиллагааны гэрээ”-нд Монгол-Германы хамтарсан Ашигт малтмал, технологийн их сургуулийн ректор, доктор, профессор Баатарын Батцэнгэл, Дрездений Техник, эдийн засгийн дээд сургуулийн ректор, доктор, профессор Инго Гестринг нар гарын үсэг зурав.

“Эрдэм шинжилгээний чиглэлээр хамтран ажиллах тухай Монгол-Германы хамтарсан Ашигт малтмал, технологийн их сургууль болон Нэгдсэн Үндэстний Байгууллагын их сургуулийн Материал болон нөөцийн нэгдсэн менежментийн хүрээлэн хоорондын харилцан ойлголцлын санамж бичиг”-т Монгол-Германы хамтарсан Ашигт малтмал, технологийн их сургуулийн ректор, доктор, профессор Баатарын Батцэнгэл, Нэгдсэн Үндэстний Байгууллагын Их сургуулийн Материал болон нөөцийн нэгдсэн менежментийн хүрээлэнгийн захирал, доктор, профессор Даниэль Карте нар гарын үсэг зурав.