Х.Нямбаатар хотын дарга байхдаа нийслэлийн торгууль, татварыг 2-10 дахин нэмсэн

Улаанбаатар хотын эрх зүйн байдлын тухай хуулиар нийслэлийн Засаг даргад нийслэлийн татварын хувь хэмжээг бие даан тогтоох том эрх олгосон билээ. Ингээд Х.Нямбаатар хотын дарга байхдаа иргэдийн татвар торгуулийг хэрхэн нэмснийг хүргэе.

1. Нийслэлийн хотын албан татвар (НХАТ)

Өмнө нь 1% байсан хотын татварыг 2% болгон нэмэгдүүлсэн. Улаанбаатар хотын нутаг дэвсгэрт үйл ажиллагаа явуулж буй зочид буудал, амралтын газар, баар ресторан, автозогсоол, бүх төрлийн согтууруулах ундаа, тамхины борлуулалтаас бид хоёр хувийн татвар төлдөг гэсэн үг.

2. Автотээврийн хэрэгслийн албан татвар

Нийслэлийн авто замын түгжрэлийг бууруулах, төсвийн төвлөрлийг нэмэгдүүлэх зорилгоор тээврийн хэрэгслийн татварт шат дараатай өөрчлөлтүүд орсон. Тээврийн хэрэгслийн хөдөлгүүрийн багтаамж болон үйлдвэрлэсэн оноос хамаарч татвар, төлбөрүүд 5-10 дахин нэмэгдсэн байдаг. Жишээ нь, приус машины татвар өмнө нь ₮36 мянга байсан бол өнгөрсөн 2025 оны нэгдүгээр сарын нэгнээс ₮108 мянга болж өссөн.

Авто зам ашигласны төлбөр 5 дахин нэмэгдсэн. Тухайлбал, приус машин өмнө нь жилд зам ашигласны төлбөр гэж ₮20 мянга төлдөг байсныг хотын дарга асан Х.Нямбаатар ₮100 мянга болгож нэмсэн. Нийтдээ нэг автомашины татвар, хураамж хамгийн багадаа ₮208 мянга болж нэмэгдсэн.

3. Үл хөдлөх хөрөнгийн албан татвар

Л.Оюун-Эрдэнийн Засгийн газраас үл хөдлөх хөрөнгийн зах зээлийн үнэлгээг дахин тогтоохдоо бүсчилсэн хэлбэрээр өмнөхөөс өндөр үнэлэмжээр тооцсон. Жишээ нь, Хан-Уул дүүрэгт байрлах 50 м.кв талбайтай байрны үл хөдлөх хөрөнгийн жилийн татвар ₮480 мянга байсан бол ₮1,05 сая болж өссөн.

4. Газрын төлбөр

Улаанбаатар хотын бүсчлэлээс хамааран газрын төлбөрийн үнэлгээнд өөрчлөлт орсон. Ялангуяа А бүс буюу хотын төв хэсэгт үйл ажиллагаа явуулж буй аж ахуйн нэгжүүдийн газрын төлбөрийг эдийн засгийн эргэлттэй нь уялдуулан нэлээд өндөр дүнгээр нэмэгдсэн.

Татвар өссөн гол шалтгаан нь дэд бүтцийн томоохон төслүүдийг (метро, Туулын хурдны зам гэх мэт) санхүүжүүлэх эрх зүйн орчин бүрдүүлэхэд чиглэгдсэн байдаг.

Эргэн сануулахад нийслэлийн татвар, торгуулийн төсвийг сайн бүрдүүлсэн гэж Х.Нямбаатар хотын дарга байхдаа нийслэлийн төсвөөс бэлэг болгон нийслэл, дүүргийн татварын хэлтсийн дарга нарын гадаадад аялах зардлыг даасан байдаг. Тодруулбал, 2026 оны 1 дүгээр сард нийслэл болон 9 дүүргийн татварын хэлтсийн дарга нар ажлаа таслан Дубай руу аялсан нь олон нийтийн дургүйцлийг төрүүлж байв.

Тэгвэл хотын шинэ удирдлагуудын зүгээс бизнес эрхлэгчид болон салбарын холбоодоос инфляц, шатахууны үнийн өсөлттэй холбоотойгоор татварын дарамтыг хөнгөлөх зорилгоор 2 хувийн татварыг 1 хувь болгон 50 хувиар бууруулахаар төлөвлөсөн байна.