Хатагтай Такайчийн энгийн хэрэглээ

Японы ерөнхий сайд, хатагтай Такайчи юу өмсөж зүүдэг нь япончуудын сонирхлыг багагүй татдаг. Энэ удаагийн сонгууль өвөл тохиож байна. Ерөнхий сайд Такайчийн өмссөн цагаан өдөн, урт хүрмийг хаана үйлдвэрлэсэн, ямар үнэтэй болохыг баахан судалцгаав. Цагаан өдөн хүрэмний зүүн ханцуй дээрх брэндийн шошгыг хааж, намын лого хадсан хэдий ч хэрэгт дурлагчид ямар брэнд болохыг олжээ. “L.L.Bean” гэх брендийн 30 мянган иен буюу 700 мянган төгрөг үнэтэй хүрмийг тэрбээр өмсжээ. Тун удалгүй энэхүү хүрэмний эрэлт эрс нэмэгдэж, үлдэгдэлгүй борлогдсон гэх.

Мөн түүнчлэн түүний сурталчилгаандаа өмссөн гутал ч япончуудын анхаарлыг татжээ. Хөлд хөнгөн эвтэйхэн, тэрхүү лофер ямар брэндийн, хэр үнэтэйг ч илрүүлжээ. Биеийн тамир спортын хувцас хэрэглэл үйлдвэрлэдэг “Kobeya Sports” компанийн бүтээгдэхүүн болохыг дор нь олж тогтоов. Энэ бол 9900 иен буюу 237,000 орчим төгрөгийн үнэтэй алхалтын зориулалтын гутал байв. Тэрбээр өмнө нь үндэсний үйлдвэрлэгчийнхээ урласан цүнхээр гоёсон нь нэлээд дуулиан дэгдээж, эрэлтийг мөн нэмэгдүүлжээ.

Хүрэм, цүнх, гутал гээд аль аль нь жирийн барааны дэлгүүрт борлогддог. Хүчирхэг эдийн засагтай, өндөр хөгжлийг олсон Япон улсын Ерөнхий сайд нь энгийн даруу бөгөөд ард түмний өргөн хэрэглээний үнэ өртөгтэй тэнцэх хувцас хэрэглэл эдэлж хэрэглэдэг. Харин манай дарга нар дэлхийн тансаг брэндийн хувцасаар гоёдог. Жишээ нь, Ерөнхий сайд асан Л.Оюун-Эрдэнэ ₮85 саяын цаг, ₮20 саяын хүрэм өмссөнийг хэрэгт дурлагчид мөн олж тогтоосон. Тэрчлэн төрсөн хүү Тэмүүлэн нь ₮20 саяын “Шанель” брэндийн цүнх, олон саяын тансаг брэндүүд, автомашин сүйт бүсгүйдээ бэлэглэсэн нь олны овоо хараанд өртөж, үүнээс болж олон нийтийн эсэргүүцэлтэй тулгарч байв.