Э.Бат-Үүл: Намаа ялалтад хүргэх нь С.Баярцогтын өөртөө тавьсан тангараг болой

Э.Бат-Үүлийн С.Баярцогтын талаарх сэтгэгдлийг хүргэж байна. Тэрбээр "С.Баярцогтын цээжийг нүцгэлээд харвал, манай намын хагарал, бутрал, ялагдал, гутралын бүх шарх сорви сийлээстэй байдаг юм, хөөрхий!

Тийм учраас, хагарал, эвдрэлээсээ болж ялагддаг ганцхан шалтгааныг, өөрийн сорвитой шархтай биеэрээ тэр дэндүү сайн мэддэг, мэдэрдэг. Шоронд байхад нь эргэж очиход, мань хүн надад өөрийнхөө тухай биш, намынхаа хагарлыг засах тухай ярихад нь би уцаарлаад, чамайг Жэнко шоронд хийсэн ш дээ гэхэд, өөдөөс юу гэсэн гээч?!

Ийм юм яриад байвал манай нам хэзээ ч ялахгүй. Намаа нураахгүйн тулд Жэнког ч уучлахаас өөр аргагүй гэж билээ!

Энэ хэлсэн үгэнд уур хүрсэн ч, Коннор Макгрегор шиг булчин шөрмөс нь зангирсан фит эр өмнө минь зогсоод, намынхаа ирээдүйг ярьж байгааг хараад, ийм нам хэзээ ч ялагдашгүй гэж би өөрийн эрхгүй зоригжсон юм даа!

Монголынхоо төлөө зүтгэснийхээ хариуд 10 жилийн ял аван хэлмэгдчихсэн хэр нь, ирээдүйн тулаанд бэлдэн зогсож байгаа түүнийг хараад ангайхаас өөр яалтай билээ! Намаа эв нэгдэлтэй болгож, ялалтад хүргэнэ гэдэг бол, зовлонгийн ёроолд байхдаа түүний өөртөө тавьсан тангараг болой!" гэжээ.