Булганд тэд ЮУ ЯРЬСАН БЭ?

Улс төрд нууц юм үгүй. Тиймдээ ч хана хүртэл чихтэй гэдэг. Булганы “Уран тогоо” гэх жуулчны баазад МАН-ын 15 давхрын бүлэглэл болон Үндэсний эвслийнхэн хамтдаа хоёр өдөр наргиж, цэнгэж, намрын зугаалга хийсэн нь баригдаж, бантсан гишүүд “хутга тавилгүй мах идэж, хундага тавилгүй архи сөгнөснөө” хэвлэлийнхэнд нуусангүй. Ерөнхийдөө “Гэрэгэ 15”-ийн фракц дээр Н.Номтойбаярын эвсэл гээд 20 гаруй гишүүн цугларсан бололтой. Нөгөө талаар Д.Амарбаясгалан ч, Л.Оюун-Эрдэнэ ч Булганы булагналд хэн, хэн ирэх вэ гэдгийг харах гэж намрын зугаалгыг зохион байгуулсан нь тодорхой. Хэрэв тэнд өмнөх шигээ 30 бүлэглэл нь бүгд цугларсан бол тэд хэдийнэ тийрэн болоод түйрэн тавьж суугаа.

Гэхдээ мэдээж, тэнд зүгээр ч нэг цугларалт болоогүй нь ойлгомжтой. Түүнээс өмнө Хэнтийн Дадалд Д.Амарбаясгалан, Л.Оюун-Эрдэнэ, Х.Нямбаатар, С.Амарсайхан, Ц.Идэрбат нар сэм уулзалдаж, нам дотроо жигүүр байгуулах тухай ярилцсан ч “өндөр” авч чадаагүй аж. Тиймээс Булганд болсон намрын зугаалгын үеэр уг асуудлыг дахин хөндөж, жигүүр биш улс төрийн клуб байгуулах, клубын тэргүүнээр О.Батнайрамдалыг тавихаар ярилцсан ч эцэслэн тохироогүй гэнэ. Зарим нэг нь О.Батнайрамдал хэтэрхий драмлаг улс төр хийдэг, өөр хүн болгосон дээр гэх байр суурьтай байсан бололтой.

Н.Номтойбаярын хувьд Булганд намынхантайгаа очсон нь ерөнхийдөө байдлыг тандах зорилготой явсан бололтой. Өнгөрсөн хавар Н.Учралын Засгийн газраас гарахыг Л.Оюун-Эрдэнэ түүнээс шаардахад эрс шулуун эсэргүүцсэн гэх “тамхины цэг”-ийн хов цацагдсан. Ямар ч байсан Засгийн газрыг огцруулах шаардлагагүй гэсэн байр сууриндаа Н.Номтойбаяр баттай зогсож байгаа гэх. Нөгөөтэйгүүр анд нөхөр Л.Оюун-Эрдэнээс илүү танхимын тэргүүн Н.Учралтай ихэд ойр байгаа аж.

Н.Номтойбаярын хувьд Н.Учралд ч, Д.Амарбаясгаланд ч тал алдахгүй, хоёулантай нь “гар барих” болсон нь бизнесмен хүний л арга тактик. Учир нь, нэгдүгээрт Үндэсний эвсэл 2024 оных шиг 4 суудал авч чадахгүй байх. Тиймээс яваандаа хуучин намдаа эргэн элсэхээр төлөвлөж буй нь тодорхой. Алим модноосоо Н.Номтойбаяр МАН-аас хол унахгүй нь улам бүр ойлгомжтой болсон.

Хэрэв Н.Номтойбаяр МАН-д ороод ирвэл Д.Амарбаясгаланд Л.Оюун-Эрдэнийн хэрэг байхгүй болно. Тэгээд ч Л.Оюун-Эрдэнэд олонтаа чадуулчихаад эрх мэдэлд эргэн очих гишгүүр нь болбол Д.Амарбаясгалан энэ дэлхийн хамгийн тэнэг улстөрч болох байлгүй.

Н.Номтойбаяр улс төрд эргэж ирэхдээ “Х.Баттулга, Л.Оюун-Эрдэнэ нартай үзэлцэнэ” гэж зарлаж байсан удаатай. Тэгээд ч талийгаач “Мунзуй”-г ашигласан Н.Номтойбаярын эсрэг ажиллагаа явуулсан нь Женко.Баттулга, Херо.Баатар нар. Херо.Баатар гэдэг нь чухамдаа бол Л.Оюун-Эрдэнэ шүү дээ. Тэгэхээр Н.Номтойбаяр, Д.Амарбаясгалан хоёр боломж олдвол хамгийн түрүүнд Л.Оюун-Эрдэнээсээ сална. Үүрдийн нөхөр, дайсан үгүй гэдэг шүү дээ.

Ямар ч байсан Булганд МАН-ын бүлгийн гишүүд айраг уухдаа ямартай ч засгийг огцруулах хүч байхгүй ч сайд нарыг нь нэг, нэгээр нь онилж хүчийг нь хэрхэн тарамдуулах тухай л ярьцгаасан бололтой. Клуб байгуулна гэдэг нь ерөнхийдөө тийм л утгатай акц байсан аж.