БНСУ-ын “KakaoBank” дараагийн зах зээлээр Монгол Улсыг нэрлэв

Банкны тухай хуулиа шинэчилбэл гадаадын банк санхүүгийн салбарынхан Монголд үйл ажиллагаа явуулах хүсэлтэй гэдгээ илэрхийлэх болсон. УИХ-ын хаврын чуулганаар энэ асуудлыг яаралтай хэлэлцэх ёстой гэсэн байр суурь дээрээ Ерөнхий сайд Н.Учрал хатуу зогсч байгаа. Гадаадын банк оруулж ирснээр банк санхүүгийн салбарын өрсөлдөөн, бүтээмж нэмэгдэнэ, зардал буурна гэдгийг эдийн засагчид хэлж байна.

Үүнтэй зэрэгцээд гадны банкууд Монголыг дараагийн гол зах зээлээр зарлаж эхэллээ.

БНСУ-ын Сөүл хотод 2026 оны 4-р сарын 8-ны өдөр болсон “2026 press talk”-ын үеэр тус улсын хамгийн том цахим банкны нэг “Какаоbank”-ны гүйцэтгэх захирал Юн Ху Ён Монголыг олон улс дахь дараагийн гол зах зээл гэж зарласан байна.

ЯАГААД МОНГОЛ ГЭЖ...?

Юн Ху Ён захирал, Индонез, Тайландын зах зээлд маш амжилттай гарч чадсан бөгөөд дараагийн тэлэлт бол Монгол гэж онцлов. Тэрбээр "БНСУ-д туршигдсан дижитал банкны хүртээмжтэй загварыг Монголд нутагшуулах нь тэдний зорилго. “KakaoBank “өөрийн эзэмшдэг "KakaoBank Score" хэмээх датад суурилсан зээлийн үнэлгээний технологийг Монголын санхүүгийн байгууллагуудад нэвтрүүлж, зээл авах боломжгүй эсвэл бага оноотой иргэдэд санхүүгийн үйлчилгээг илүү ойртуулахаар төлөвлөж байна" гэжээ.

“KakaoBank” нь Монголын банк санхүүгийн салбарт технологийн шинэчлэл авчирч, дата аналитик дээр суурилсан зээлийн бүтээгдэхүүн хөгжүүлэх суурь болно гэж шинжээчид бичжээ.

Тус банк нь 2026 онд үйл ажиллагаагаа бүрэн AI (хиймэл оюун ухаан)-д суурилсан хэлбэрт шилжүүлж, хэрэглэгч чатбот ашиглан яг хүнтэй харилцах мэтээр бүх үйлчилгээг авах боломжтой болгох гэнэ. Тухайлбал, БНСУ-д амьдарч байгаа монголчууд, гадаад иргэдэд зориулж хиймэл оюун ухаанд суурилсан орчуулгын систем, дебит карт болон хадгаламжийн үйлчилгээг гаргахаа зарласан байна.

БНСУ-ын “KakaoBank”-ы зээлийн багцын 33% нь дундаас доош зээлийн оноотой иргэдэд олгосон зээл байдаг. Үйлчлүүлэгчдийнх нь 56% нь зээлийн оноогоо сайжруулсан статистик  бий.

Мэдээж, дижитал банк учраас барьцаагүй зээл авах боломжтой төдийгүй шилжүүлэг болон үйлчилгээний шимтгэлийг хамгийн бага байлгах бодлого баримталдаг байна.

Н.УУГАН