Бээжин: Төрийн өмчит компаниуддаа $54 тэрбумыг олгоно

Хятад улс санхүүгийн системээ бэхжүүлж, саажиж буй эдийн засгаа дэмжих зорилгоор төрийн өмчит 8 банк болон даатгалын компанид хэдэн арван тэрбум ам.долларын хөрөнгө оруулж байна.

BBC (2026-09-07)

Хятадын Сангийн яамны хийж буй уг хөрөнгө оруулалтын нийт хэмжээ 360 тэрбум юань ($53.6 тэрбум) хүрэхийг "Синьхуа" ням гаригт мэдээлэв.

Уг алхам нь "тэдгээрийн үйл ажиллагааны найдвартай байдал, эрсдэл даах чадвар болон бодит эдийн засагт үйлчлэх чадамжийг улам нэмэгдүүлнэ" гэж уг мэдээнд дурджээ.

Өнөөгийн Хятад улс Өрнөдийн орнуудтай үүсгээд буй худалдааны хурцадмал байдал, Ираны дайны нөлөө болон хүн амын хөгшрөлт зэрэг сорилтуудтай тулгарч буй энэ үед уг шийдвэр нь дэлхийн хоёр дахь том эдийн засгийг сэргээх гэсэн Бээжингийн сүүлийн үеийн нэг оролдлого юм.

Энэхүү дэмжлэгийн багц нь Хятадын Үйлдвэр, худалдааны банк (ICBC), Хятадын Хөдөө аж ахуйн банк (ABC) болон Хятадын Экспорт, зээлийн даатгалын корпораци зэрэг гурван том зээлдүүлэгч, таван даатгалын компанийн санхүүг бэхжүүлэх юм.

"Энэ нь глобал санхүүгийн тодорхойгүй байдлын үед банкийг гадаад шоконд тэсвэртэй болгохын тулд тэдэнд бодит эдийн засаг руу чиглэсэн зээл олгох илүү их нөөцийг бүрдүүлж өгнө" гэж "Global Times" төрийн мэдээллийн хэрэгсэл онцоллоо.

Бээжин ажиллах хүчний хомсдол болон хэдэн жилийн турш үргэлжилж буй үл хөдлөх хөрөнгийн зах зээлийн уналт, мөн түүнчлэн АНУ-тай хийж буй худалдаа, технологийн өрсөлдөөн зэрэг олон асуудалтай тулгарч байгаа энэ үед дээрх шийдвэр гарлаа. Ерөнхийлөгч Ши Жинпин санхүүгийн тогтвортой байдлыг үндэсний аюулгүй байдлын гол тулгуур гэж удаан хугацаанд үзсээр ирсэн юм.

Дотоодын эрэлт суларсан байдал болон Ираны дайнаас үүдэлтэй нефтийн үнийн өсөлт нь тус улсын экспортыг хямралт оруулж, Хятадын эдийн засгийн өсөлт дөрөвдүгээр сарын эхнээс зургаадугаар сарын төгсгөл хүртэлх хугацаанд эрс саарав.

Долоодугаар сард танилцуулсан дотоодын нийт бүтээгдэхүүний (ДНБ) албан ёсны мэдээллээр Хятадын эдийн засаг хоёрдугаар улиралд 4.3%-иар өссөн нь Бээжингийн хүлээлтээс бага байсан бөгөөд нэгдүгээр улиралд 5%-ийн өсөлт үзүүлээд байсан юм.

Гуравдугаар сард Бээжин эдийн засгийн өсөлтийн зорилтот түвшнийг 4.5%-5% болгон бууруулсан нь 1991 оноос хойшхи хамгийн бага өсөлтийн зорилт болсон бөгөөд шинжээчид үүнийг эдийн засагт тулгарч буй сул талуудаа хүлээн зөвшөөрсөн алхам хэмээн тайлбарлаж байна.