АНУ-ын “Визний бонд” хөтөлбөр Монголд хэрэгжинэ

АНУ виз олголтоо нэлээд чангалж байна. Энэ оны эхээр Трампын засаг захиргаа нийт 75 улсын иргэдэд цагаачлалын виз олгох үйл явцыг тодорхойгүй хугацаагаар зогсоосон. Тэдгээр 75 улсын жагсаалтад Монгол Улс багтсан юм.

Хориг 2026 оны нэгдүгээр сарын 21-нээс хэрэгжиж эхэлсэн. Үүнд ажлын түр хугацааны, аяллын болон тус улсад сурах визүүд багтаагүй. Тэгвэл тус улсын Төрийн департаментаас "визний бонд" хөтөлбөр хэрэгжүүлэхээр болжээ.

АНУ нь цагаачлал, аюулгүй байдлын бодлогоо илүү чангатгаж буй нь олон улсын геополитикийн нөхцөл байдалтай холбоотой байж болзошгүй юм.

Визний бонд хөтөлбөр нь "Би хууль зөрчихгүй, хугацаандаа буцаж ирнэ" гэдгээ мөнгөөр баталгаажуулж буй хэрэг юм.

Хэрэв консул таныг "буцаж ирэх магадлалтай ч бага зэргийн эрсдэлтэй" гэж үзвэл нэмэлт санхүүгийн баримт шаардана гэсэн үг. Жишээ нь, таны дансанд дор хаяж $5,000 - $15,000 (ойролцоогоор 17-52 сая төгрөг) байршуулах боломжтой байх ёстой. Энэ мөнгийг виз гарсны дараа АНУ-ын албан ёсны системээр төлдөг. Энэ мөнгө нь хаанаас гарсан болохыг (цалин, хадгаламж, мал хөрөнгө борлуулсан гэх мэт) нотлох шаардлагатай.

Визний бонд шаардуулахгүйгээр виз авах хамгийн сайн арга бол Монголдоо заавал буцаж ирнэ гэсэн баталгаа харуулах ёстой юм. Энэ хүрээнд үл хөдлөх хөрөнгийн баталгаагаа бэлдэх шаардлага тулгарч магадгүй. Өөрөөр хэлбэл, өөрийн нэр дээрх байр, хашаа байшин, газар, машины гэрчилгээг бэлдэх ёстой юм. Тогтвортой ажиллаж буйг нотлох НДШ-ийн лавлагаа, ажлын газрын тодорхойлолт, Монголд үлдэж буй гэр бүлийн гишүүд, хамаарал бүхий хүмүүсийн мэдээллийг ч нэхэж болзошгүй.

Хэрэв та АНУ явах гэж төлөвлөж буй бол зөвхөн АНУ-ын Төрийн департаментаас зөвшөөрөгдсөн, итгэмжлэгдсэн агентлагаар дамжих шаардлагатай.

Тэрчлэн өмнө нь АНУ-д зорчиж байсан бол хугацаа хэтрүүлээгүй, хууль зөрчөөгүй байх нь “тус улсын виз авахад хамгийн том давуу тал болно.

Г.ПҮРЭВ