АН-ын алдсан өмчийг олж авахын тулд О.Цогтгэрэл ах нартайгаа шүүхдэнэ!

С.Зоригийн хөшөө хулгайд алдагдсаны дараахан Ардчилсан намын дарга О.Цогтгэрэл мэдэгдэл хийж, тус нам өмчөө эргүүлэн олж авахаар шүүхэд зарга үүсгэсэн талаар дуулгасан юм. Уг асуудлаар наймдугаар сарын 17-нд анхан шатны шүүх хурал товлогджээ.

АДХ-ын Гүйцэтгэх захиргаанаас 1990 онд хуучнаар МОНЦАМЭ агентлаг байрлаж байсан барилгыг Үндэсний дэвшлийн нам буюу Шинэ дэвшилтэт холбоонд олгох шийдвэр гаргажээ. Харин Ардчилсан социалист хөдөлгөөнийхөн болон Монголын социал демократ намынханд Соёлын төв өргөө болон Дуурь бүжгийн эрдмийн театрын хооронд байрлах “хүзүүвч” гэгдэх байрыг газартай нь өгсөн бол Ардчиллын ордонг МоАХ болон Монголын ардчилсан намд олгосон байна. 2000 оны арванхоёрдугаар сарын 6-ны өдөр Монголын ардчилсан нам, Сэргэн мандалын нам, Монголын социал демократ нам, Монголын үндэсний ардчилсан нам, Монголын шашинтны ардчилсан нам нэгдэж, Ардчилсан намыг байгуулсан.

Тиймээс дээрх 5 намын өмч бол хууль ёсоороо Ардчилсан намын өмчид тооцогдох ёстой. Атал өнөөдөр Ардчилсан нам орон байргүй гудамжинд гараад удаж байна. Үүнд өмчөө зарсан, хулгайлсан ах нар нь буруутай юу гэвэл буруутай!

С.Зориг агсны хөшөөний дэргэдэх Шинэ дэвшилт ”холбооны эзэмшлийн байр (муурын байшин)-ны доорх газрыг Д.Зоригт, Да.Ганболд нар “Голомт” банкны үүсгэн байгуулагч Д.Баясгалангийн хамаарал бүхий “Ардчилалын өргөө” ХХК-д худалдсан байна.

Харин Соёлын төв өргөө, ДБЭТ-ын дундах хүзүүвч буюу АН-ын төв байрны газрын Н.Алтанхуяг тус намын даргаар ажиллаж байхдаа ХХБ-ны эзэн Д.Эрдэнэбилэгт 7 тэрбумаар зарсан байдаг.

Тэгвэл улсын бүртгэлээс харахад "Ардчиллын ордон" нь МоАХ-ны өмч гэх ч үндсэндээ тус холбооны тэргүүн, итгэмжлэлгүйгээр төлөөлөх эрх бүхий этгээдээр УИХ-ын Х.Баттулгыг бүртгэжээ. Өөрөөр хэлбэл, аль хэдийнэ Х.Баттулга өөрийн өмч, хөрөнгө болгоод хулгайлчихсан гэсэн үг.

Тиймээс Ардчилсан намын алдсан, зарсан өмчүүдээ эргүүлэн олж авахын тулд О.Цогтгэрэл ах нартайгаа шүүхдэлцэхээр болж байна. Алийн болгон Ардчилсан нам шиг хөлсний байраар тэнүүлчилж, хүний царай харж явах билээ.

Б.БАТ